Conversas con persoas con vidas e historias interesantes 😉
Podcast, mellor falangullo, emitido desde Coia (Vigo). Intéresanos escoitar a persoas que teñen vidas inspiradoras. Media hora de programa para coñecer as súas historias contadas por elas mesmas. Podedes escoitar todos os podcast na web: http://alicerces.arkipelagos.net/radio-manoplas
A novena entrevistada da sexta tempada é Sandra Fernández Carrera.
Vive en Santa Cristina (Oleiros), aínda que medrou pasando moito tempo nas rúas, nun contexto de forte pertenza comunitaria. Estudou INEF en Bastiagueiro e desenvolveu a súa traxectoria profesional no ámbito da actividade física e da saúde.
Sandra conta as súas experiencias familiares. Están marcadas pola loita da súa nai, Dora, unha das impulsoras de Érguete, que buscaba alternativas para o seu fillo e para moitos outros. Sandra mamou na casa o compromiso e a loita contra as inxustizas. Anos máis tarde, tivo que afrontar retos semellantes na crianza dos seus fillos, un deles con parálise cerebral. Este camiño levouna a defender unha educación inclusiva. Hoxe imaxina e constrúe un futuro baseado en comunidades amplas e acolledoras.
Pechamos a entrevista celebrando a bravura de Sandra por poñer os desexos enriba da mesa e despedímonos coa canción “En plena calle”, de Mr. Kilombo.
Botádenos unha man compartindo este proxecto, que podedes escoitar na nosa web: radiomanoplas.org e nas principais plataformas de audio.